គ្រាន់តែជិះម៉ូតូវ៉ាទៅមុន ខឹងដេញតាមធាក់ធ្លាក់ពីលើម៉ូតូរងរបួស២នាក់
រាជធានីភ្នំពេញ ៖ កម្មករសំណង់២នាក់បានរងរបួសរលាត់ដៃរលាត់មុខ បន្ទាប់ពីត្រូវភាគីម្ខាងជិះម៉ូតូដេញតាមធាក់ធ្លាក់ពីលើម៉ូតូ ខណៈខឹងជិះវ៉ានៅកន្លែងភ្លើងស្តុប កាលពីវេលាម៉ោង១១ និង២០នាទីយប់ថ្ងៃទី២៨ ធ្នូ ២០១៤ នេះ ស្ថិតនៅចំណុចមុខព្រលានយន្តហោះក្បែរ «ពោធិ៍ចិនតុង ញូវ ថោន» នៅលើផ្លូវសហព័ន្ធរុស្ស៊ី ។
ប្រភពបានឱ្យដឹងថា ជនរងគ្រោះទាំង២នាក់ ១-ឈ្មោះយ៉ែម វ៉ា អាយុ២៧ឆ្នាំ និង២-ឈ្មោះហៀ សុធា អាយុ២១ឆ្នាំ ទាំង២នាក់ជាកម្មករសំណង់នៅអូរបាយក្អម មានទីលំនៅជិតវត្តជម្ពូវ័ន្ត ជិះម៉ូតូម៉ាកវ៉េវ ពណ៌ក្រហម កំពង់ធំ១C-3078 ។
ចំណែកឯភាគីបង្កមានម៉ូតូ៣គ្រឿង ១-ម៉ូតូ AZ ពណ៌ស ពាក់ស្លាកលេខភ្នំពេញ1BZ 887 , ២-ម៉ូតូគុប ពាក់ស្លាកលេខភ្នំពេញ 1K-2970 និង៣-ម៉ូតូសង់ C125 (រត់បាត់) ។ ប្រភពបន្តថា មុនពេលកើតហេតុ ម៉ូតូរបស់កម្មករទាំង២ជិះមកពីអូរបាយក្អម បម្រុងជិះទៅផ្ទះនៅជម្ពូវ័ន្ត ខណៈមកដល់ភ្លើងស្តុបបានឈប់រង់ចាំ លុះពេលចេញទៅក៏បានរោទ៍ម៉ូតូខ្លាំងហើយក៏ជិះវ៉ាម៉ូតូទាំង៣គ្រឿងនោះ ធ្វើឱ្យអ្នកជិះម៉ូតូ AZ ខឹងស្មានតែឌឺរូបគេ ក៏ជិះដេញតាមធាក់តែម្តង ។
ពេលនោះក៏បានប្រទះជាមួយមេប៉ុស្តិ៍ចោមចៅកំពុងល្បាត ក៏បានធ្វើការឃាត់ខ្លួនទាំងអស់ ដើម្បីសួរនាំ ។
ប្រភពពី:កោះសន្តិភាព
No comments:
Write comments