ម៉ាទឹកកកជិត៥គីឡូក្រាម ត្រូវបានរឹបអូសពីបុរសជនជាតិឡាវម្នាក់នៅលើទឹកដីខ្មែរ

ម៉ាទឹកកកជិត៥គីឡូក្រាម ត្រូវបានរឹបអូសពីបុរសជនជាតិឡាវម្នាក់នៅលើទឹកដីខ្មែរ

Comment 0 (s) / 20-Jul-2025

មនុស្សនិងសង្គម

 វា​​ពិត​ជា​ករ​ណី​ដ៏​គួរ​ឱ្យ​ភ្ញាក់មួយ​ ​ខណៈ​ដែល​មក​ដល់​ពេល​នេះ​ទៅហើយ​ ចរាចរណ៍​គ្រឿងញៀន​នៅតែ​បន្តមាន​យ៉ាង​រដឹក​នៅលើទឹក​ដី​នៃ​ព្រះរាជា​ណា​ចក្រ​កម្ពុជា ដែនដីអច្ឆរិយៈនៃយើង ។ បើយោង​តាម​ការ​ចុះផ្សាយ​អត្ថបទ​ពត៌មាន​មួយ​ដោយ​កាសែត​ ​ខេមបូឌៀ ដេលី បានឱ្យដឹងថា៖ បុរស​សញ្ជាតិ​ឡាវ​ វ័យ២១ឆ្នាំម្នាក់ ឈ្មោះ Chakli Cheutali ត្រូវបានអាជ្ញាធរកម្ពុជាប្រយុទ្ធប្រឆាំងការជួញដូរគ្រឿងញៀន ឃាត់ និងរឹបអូសភ្លាមៗនៅនឹងកន្លែង បន្ទាប់​ពីការស៊ើបអង្កេតរកមុខសញ្ញា និងខ្សែបណ្ដាញរបស់ពួកគេអស់រយៈពេលជាង៣ខែកន្លងមកនោះ ។

បើ​តាម​សម្ដីរបស់ប្រធានការិយាល័យរដ្ឋបាលនៃនាយកដ្ឋានប្រយុទ្ធប្រឆាំងគ្រឿងញៀន លោក អិន សុង បានឱ្យដឹងថា៖ យុវជនជនជាតិឡាវឈ្មោះ Chakli Cheutali រូបនេះ បានយួរកាបូបមួយកំពុងដើរលើផ្លូវក្នុងភូមិខាំផន ឃុំសាមគ្គី ក្រុងស្ទឹងត្រែង ដោយបន្ទាប់ពីបានហែកឆែកឆេរមើល បាន​រក​ឃើញ​មានកញ្ចប់ថង់ផ្លាស្ទិកចំនួន៥លាក់ថ្នាំញៀនប្រភេទ ម៉ាទឹកកក ឬ(Crystal Methamphetamine) សរុបទម្ងន់ ៤.៩៧៨ គីឡូក្រាម ដែល​មាន​តម្លៃ​​​ជាទឹកលុយចំនួនជាង១០ម៉ឹនដុល្លារអាមេរិក ។

យោងតាមប្រភពដដែល, លោក សុង បានបំភ្លឺឱ្យដឹងថា៖ ក្មេងប្រុសជនជាតិឡាវរូបនេះ គឺគ្រាន់តែជាក្មេងដើរចែកចាយថ្នាំញៀនទេ ចំណែក​ឯមេ​របស់​គេ​វិញគឺកំពុងសម្ងំលាក់ខ្លួននៅក្នុងប្រទេសឡាវឯណោះ ហើយថ្នាំញៀនទាំងនេះ ត្រូវបានលោកសន្មត់ថាមានប្រភពនាំចេញមកពីតំបន់ត្រីកោណ (ថៃ, ឡាវ, និងភូមា) ដ៏ខ្មៅងងឹត ដែលជាកន្លែងដាំអាភៀនដ៏ធំជាងគេមួយក្នុងតំបន់អាស៊ីអាគ្នេយ៍ ។

ដោយ៖ ឈូកស
ប្រភព៖ ខេមបូឌៀ ដេលី